آخر أعماله مع حسن الرداد.. وفاة الفنان عادل هلال

رحل عن عالمنا الفنان عادل هلال، والذي قدم العديد من الأعمال في فترة التسعينيات وفي الألفينات.

وأعلن وفاة عادل هلال، الكاستينج دايركتور إبراهيم عمران عبر حسابه الشخصي على فيسبوك، حيث كتب :"البقاء لله وحده .. توفى إلى رحمة الله الفنان عادل هلال .. الله يرحمه ويغفر له ويسكنه فسيح جناتة يارب العالمين .. من حوالي 20 يوم لقيت نفسي بنته بتتصل بيا وبتقولي بابا بيسلم عليك أوي .. وبعتلك السلام وهو اللي عطاني رقم تليفونك علشان أنا في الشغل فقلتلي .. لازم أوصله الرسالة قلتلها ده باباكي حبيبي وصديقي من سنين ..  وأنا اشتغلت معاه في حاجات كتير زي فيلم البلدوزر بتاع يوسف منصور وشيرين سيف النصر كانت أول مرة تمثل معانا في الفيلم".

وواصل : "والفيلم كان من إخراح حسام الدين مصطفي الله يرحمه مع احترامي للألقاب طبعًا .. غير كدا اشتغل كتير في كل أفلام نادية الجندي كلها .. الله يرحمه كان إنسان محترم .. وبيحب الناس كلها وكان محبوب من كل الناس .. وكان بيحب شغله أوي وملتزم في كل اعماله عاش في صمت .. ورحل في صمت .. فأنا موجود في مكان تصوير اليوم بنته قابلتني ولقيت اللي بيقولي إزيك يا استاذ إبراهيم قلتلها أهلًا وسهلًا بحضرتك .. قلتلي انت مش فاكرني .. قلتلها مش واخد بالي .. بحسبها ممثلة أو حد اشتغل معايا قبل كدا".

وتابع إبراهيم عمران : "لقيتها بتقلي أنا بنت الأستاذ عادل هلال .. بقلها بابا عامل إيه ده وحشني جدًا .. وكنت لسه مكلمه قالتلي بابا تعيش أنت .. قلتلها من امتى دنا لسه مكلمة وبطمن عليه .. صدمتني لا حول ولا قوة الابالله العلي العظيم .. الموت علينا حق وإنا لله وإنا إليه راجعون .. فعلاً ربنا يكفينا شر الغفلة وللأسف محدش يعرف حاجة عنة".

يُذكر أن آخر أعمال الفنان عادل هلال كان مسلسل حق ميت بطولة الفنان حسن الرداد، والذي عُرض في عام 2015، وشارك في بطولته عدد من النجوم بينهم إيمي سمير غانم وأحمد عبدالعزيز وهادي الجيار وغيرهم، والعمل تأليف باهر دويدار وإخراج فاضل الجارحي.