حلّت الفنانة المصرية هدى المفتي ضيفة على برنامج «صاحبة السعادة» مع الإعلامية إسعاد يونس على شاشة dmc، حيث فتحت قلبها وتحدثت عن علاقتها بالشائعات، وأول تجربة حب تركت جرحًا نفسيًا، وصفات فتى أحلامها، وأسرار تُذاع لأول مرة على الشاشة.
في أول تعليق صريح على الشائعة التي ربطتها بأغنية «البخت» للنجم ويجز، نفت هدى المفتي تمامًا وجود أي علاقة بينها وبين الأغنية أو صاحبها، قائلة: «صحيت من النوم لقيت الدنيا مقلوبة، رسايل على إنستغرام وإكس، وصحبتي قالتلي الناس فاكرة الأغنية اتكتبت عشاني، بس ده مش حقيقي».
وأضافت: «أنا بحب شغله جداً، فنان خطير وموهوب، بس اللي ضايقني إن الناس افترضت بدون أي دليل».
وعن أول تجربة عاطفية مرت بها في سن 17 عامًا، وصفت هدى العلاقة بأنها كانت تجربة صعبة انتهت بصدمة نفسية، لكنها شكلت نقطة تحول في حياتها.
قالت المفتي: «خرجت من العلاقة بتروما، بس اتعلمت كتير... اتعافيت منها في شهرين ونص، وعرفت إن لازم تكون قوي قبل ما تدخل حاجة جديدة».
وتابعت:«أنا الراجل بتاع نفسي، وقعت كتير، وكل مرة كنت اللي بقوم نفسي بنفسي... كنت ماسكة في حاجة بتوجع، ولما سبتها، عرفت يعني إيه حدودي الشخصية».
الحب؟ له مواصفات عند هدى
ورغم صدق مشاعرها ووضوحها في التعبير عن العلاقات، أكدت هدى أنها لم تتلقَّ عرض زواج حقيقي حتى الآن، مشيرة إلى أنها لا تُعطي اهتمامًا كبيرًا للشائعات العاطفية، لأنها تفضّل ترك الأمور تأخذ مجراها الطبيعي.
وعن مواصفات فتى أحلامها، قالت: يكون ذكي، طموح، عنده شغف بشغله، بيحترم الأسرة ويدعمني ويقدّرني. عايزة نسهّل على بعض الحياة»، وشدّدت هدى المفتي على رفضها الكذب أو التصرفات التي تقلّل من شأنها.
وأضافت: «أنا عارفة إنه طالع عليا إشاعة إني اتخطبت أو هتخطب، بس دي مش صحيحة تمامًا.. لو اتخطبت هقول وأكيد مش هخبي، ونفرح كلنا مع بعض».
وأشارت إلى أن والدها كان يؤمن أن «الست مش محتاجة تتجوز إلا لو هي عايزة، مش لازم تتجوز عشان المجتمع»، مضيفة: «ماما كانت تقعد تقولي طيب يا هدى مفيش حد خالص؟!، وهي وبابا كانوا عكس بعض في مسألة الجواز دي».
